Սպիտակ համայնքի Սարամեջ բնակավայրի վարչական ղեկավար Թամարա Մինասյանը 2024 թվականի սեպտեմբերի 17-ին Սպիտակ համայնքի ղեկավարին ներկայացրել է վարչական բողոք՝ խնդրելով անվավեր ճանաչել Սպիտակ համայնքի ղեկավարի 2024 թվականի հուլիսի 18-ի թիվ 152 կարգադրությունը։ Սպիտակ համայնքի ղեկավարի 2024 թվականի հուլիսի 18-ի թիվ 152 կարգադրությամբ Սպիտակ համայնքի Սարամեջ բնակավայրի վարչական ղեկավար Թամարա Մինասյանի նկատմամբ կիրառվել է կարգապահական տույժ՝ նկատողություն։ Հայաստանի Հանրապետության աշխատանքային օրենսգրքի 228-րդ հոդվածի համաձայն՝ կարգապահական տույժը կարող է բողոքարկվել դատական կարգով՝ տվյալ կարգապահական տույժը կիրառելու մասին իրավական ակտն օրենքով սահմանված կարգով ուժի մեջ մտնելուց հետո` մեկ ամսվա ընթացքում։ Հայաստանի Հանրապետության աշխատանքային օրենսգրքի 228-րդ հոդվածի վերլուծությունից հետևում է, որ կարգապահական տույժը վարչական կարգով բողոքարկելու իրավական հնարավորություն առկա չէ, ուստի Թամարա Մինասյանը իր նկատմամբ նշանակված կարգապահական տույժը վարչական կարգով բողոքարկելու իրավունք չունի։ «Վարչարարարության հիմունքների և վարչական վարույթի մասին» Հայաստանի Հանրապետության օրենքի 53-րդ հոդվածի 1-ին մասի համաձայն՝ վարչական ակտն արտաքին ներգործություն ունեցող այն որոշումը, կարգադրությունը, հրամանը կամ այլ անհատական իրավական ակտն է, որը վարչական մարմինն ընդունել է հանրային իրավունքի բնագավառում կոնկրետ գործի կարգավորման նպատակով, և ուղղված է անձանց համար իրավունքներ և պարտականություններ սահմանելուն, փոփոխելուն, վերացնելուն կամ ճանաչելուն: «Վարչարարարության հիմունքների և վարչական վարույթի մասին» Հայաստանի Հանրապետության օրենքի 53-րդ հոդվածի 1-ին մասի վերլուծությունից հետևում է, որ վարչական ակտի անհրաժեշտ նախապայմաններ են հանրային իրավունքի բնագավառում ընդունված լինելու և արտաքին ներգործություն ունենալու հանգամանքը։ Տվյալ պարագայում Սպիտակ համայնքի ղեկավարի 2024 թվականի հուլիսի 18-ի թիվ 152 կարգադրությունն ընդունող մարմինը թեև հանրային իրավունքի սուբյեկտ է, սակայն ընդունված իրավական ակտը մասնավոր՝ աշխատանքային իրավահարաբերությունների շրջանակներում է ընդունվել և արտաքին ներգործություն չունի, քանի որ դրա ներգործությունը տարածվում է այն ընդունող մարմնին ենթակա աշխատողի վրա։ Ելնելով վերոգրյալից և ղեկավարվելով Հայաստանի Հանրապետության աշխատանքային օրենսգրքի 228-րդ հոդվածով, «Վարչարարության հիմունքների և վարչական վարույթի մասին» Հայաստանի Հանրապետության օրենքի 50-րդ հոդվածի 1-ին մասի «զ» կետով՝ որոշում եմ․
1․ Սպիտակ համայնքի Սարամեջ բնակավայրի վարչական ղեկավար Թամարա Մինասյանի 2024 թվականի սեպտեմբերի 17-ի վարչական բողոքի հիման վրա հարուցված վարչական վարույթը կարճել։