Սպիտակ համայնքի բնակիչ Արսեն Դունամալյանը 2025 թվականի մարտի 7-ին դիմել է Սպիտակ համայնքի ղեկավարին՝ խնդրելով իրեն պատկանող Շիրակի խճուղի 149 հասցեին կից համայնքային հողամասը ընդլայնելու նպատակով վարձակալությամբ տրամադրել իրեն։ Հայաստանի Հանրապետության հողային օրենսգրքի 66-րդ հոդվածի 1-ին մասի 8-րդ կետի համաձայն՝ պետության և համայնքների սեփականություն հանդիսացող հողամասերի ուղղակի վաճառքը կատարվում է քաղաքացիներին կամ իրավաբանական անձանց սեփականության իրավունքով պատկանող հողամասերի ընդլայնման համար, եթե հնարավոր չէ լրացուցիչ օտարվող հողամասը որպես առանձին գույքային միավոր օտարել աճուրդային կարգով: Ընդլայնման ենթակա հողամասը որպես առանձին գույքային միավոր աճուրդային կարգով օտարելու հնարավորությունը որոշվում է համաձայն Հայաստանի Հանրապետության կառավարության սահմանած չափորոշիչների: Հողամասի ընդլայնման նպատակով հողամաս կարող է տրամադրվել մեկից ավելի անգամ, ընդ որում՝ որպես ընդլայնում տրամադրվող հողամասերի մակերեսների հանրագումարը չի կարող գերազանցել ընդլայնվող հողամասի՝ մինչև առաջին անգամ ընդլայնվելը պետական գրանցում ստացած հողամասի մակերեսը։ Սպիտակ քաղաք, Շիրակի խճուղի 149 հասցեում գտնվող 06-006-0441-0007 կադաստրային ծածկագրով հողամասը Արսեն Դունամալյանին պատկանում է կառուցապատման իրավունքով, մինչդեռ Հայաստանի Հանրապետության հողային օրենսգրքի 66-րդ հոդվածի 1-ին մասի 8-րդ կետի համաձայն ընդլայնվել կարող է այն հողամասը, որը պատկանում է անձին սեփականության իրավունքով։ Ընդ որում, նույն կետի համաձայն ընդլայնման ենթակա հողամասը կարող է տրամադրվել միայն օտարման եղանակով՝ ուղղակի վաճառքի միջոցով, մինչդեռ Արսեն Դունամալյանը դիմումում նշել է, որ հողամասը ցանկանում է ձեռք բերել վարձակալությամբ։ Ելնելով վերոգրյալից և ղեկավարվելով «Վարչարարության հիմունքների և վարչական վարույթի մասին» Հայաստանի Հանրապետության օրենքի 53-րդ, 54-րդ և 55-րդ հոդվածներով, Հայաստանի Հանրապետության հողային օրենսգրքի 66-րդ հոդվածի 1-ին մասի 8-րդ կետով` որոշում եմ.
1.Արսեն Դունամալյանի 2025 թվականի մարտի 7-ի դիմումը մերժել։
2․Սույն որոշումն ուժի մեջ է մտնում Արսեն Դունամալյանին Հայաստանի Հանրապետության օրենսդրությամբ սահմանված կարգով և ժամկետում իրազեկելուն հաջորդող օրվանից։
3․Սույն որոշումը կարող է վարչական կարգով բողոքարկվել Սպիտակ համայնքի ղեկավարին կամ դատական կարգով՝ ուժի մեջ մտնելու օրվանից երկու ամսվա ընթացքում։