«Արվեստ23» ՀԿ-ն մեկնարկում է «Ծնվել եմ Արցախում» կրթական ծրագիրը Արցախում ծնված և այժմ ՀՀ-ում բնակվող մինչև 18տ. (ներառյալ) տաղանդավոր պատանի երաժիշտների համար հետևյալ մասնագիտություններով՝ ջութակ, ալտ, թավջութակ, ֆլեյտա, հոբոյ, կլարնետ, ֆագոտ, գալարափող, շեփոր, տրոմբոն, հարվածային գործիքներ (ոչ ազգային նվագարաններ), դաշնամուր և տավիղ: «Ծնվել եմ Արցախում» ծրագրի գաղափարի հեղինակն է UNICEF-ի ազգային դեսպան, դիրիժոր Սերգեյ Սմբատյանը։ Այս նախաձեռնությունը կրթվելու, զարգանալու և աճելու յուրահատուկ հարթակ է Արցախից տեղահանված մեր հայրենակից երիտասարդ սերնդի համար՝ միտված լինելով մասնագիտական և ֆինանսական աջակցության միջոցով ուղի հարթել դեպի իրենց ապագայի վերաիմաստավորում, նպատակների իրագործում և միջազգային մեծ բեմեր։ Ծրագրում ընդգրկվելու մրցութային փուլերը հաղթահարած դիմորդները կստանան հնարավորություն անվճար հիմունքներով մասնակցել վարպետության դասերի, հանդես գալ համերգային ելույթներով, անվճար մասնակցել օտար լեզուների բանավոր խոսքի զարգացման դասերի, այցելել ՀՀ թանգարաններ, Հայաստանի պետական սիմֆոնիկ նվագախմբի կազմակերպած հայաստանյան համերգներին, կստանան ֆինանսական աջակցություն և անհրաժեշտության դեպքում՝ երաժշտական գործիք, համակարգիչ և համացանցի հասանելիություն։ Աշխարհում ամենակարդացվող կենսագրությունները համարվում են արտիստների կենսագրությունները: Դրանք ամենաշատն են տարածվում և ունեն ազգային պատկանելիության ամենաազդեցիկ դերը։ «Ծնվել եմ Արցախում» ծրագիրը, խթանելով իր մասնակից-երաժիշտների մուտքը միջազգային ասպարեզ, նպատակ ունի նրանց կենսագրություններում «Ծնվել եմ Արցախում» արտահայտությունը դարձնել ամենակարդացվողը աշխարհում՝ այդպիսով հանրահռչակելով Արցախի մշակութային ժառանգությունն աշխարհի ամենաբարձր բեմերում։ Ծրագրին դիմելու վերջնաժամկետն է ս./թ. սեպտեմբերի 25-ը: Ծրագրին դիմելու կարգը, դիմումհայտը և այլ մանրամասները ներկայացված են «Արվեստ23» ՀԿ-ի www.arvest23.org կայքէջում: