Ս.թ. հոկտեմբերի 21–29-ը Վանաձորում գործող «Շունն ու Կատուն» անասնաբուժական կլինիկայում՝ «ՎԵՏՄԻՐ» ՍՊԸ, բարեգործական ակցիայի շրջանակում իրականացվելու են շուրջ 500 անվճար վիրահատություններ՝ ասեպտիկայի, հետվիրահատական հսկողության և կենդանիների հաշվառման բոլոր պահանջների պահպանմամբ։
Tierschutz Entwicklungshilfe e.V. կազմակերպությունը 2021 թվականից իրականացնում է միջազգային բարեգործական ակցիաներ շների և կատուների ստերիլիզացիայի և պատվաստման ուղղությամբ՝ Fondation Brigitte Bardot-ի, ինչպես նաև տեղական ինքնակառավարման մարմինների, պետական կառույցների և ոչ առևտրային կազմակերպությունների հետ համագործակցությամբ։ Կազմակերպության ծրագրերը միտված են անտուն կենդանիների թվի մարդասիրական կրճատմանը, վարակիչ հիվանդությունների կանխարգելմանը և բնակչության անվտանգության բարձրացմանը։ Լոռու մարզում նախատեսում ենք իրականացնել լայնամասշտաբ ստերիլիզացիոն ակցիա Fondation Brigitte Bardot-ի և «Շունն ու Կատուն» անասնաբուժական կլինիկայի հետ համագործակցությամբ։ Ակցիան նախատեսված է 2025 թվականի հոկտեմբերի 21–29-ը և կիրականացվի տարածաշրջանի միակ անասնաբուժական կլինիկայի՝ Վանաձոր քաղաքի «Շունն ու Կատուն» կլինիկայի բազայի վրա։ Նույն օրերին նմանատիպ միջոցառումներ նախատեսված են նաև Իջևանում և Երևանում։ Ակցիայի ընթացքում նախատեսվում է կատարել առնվազն 500 վիրահատություն։