Բնության համաշխարհային հիմնադրամի (WWF) հայաստանյան մասնաճյուղի նախաձեռնությամբ 2008 թվականից ի վեր Հայաստանում իրականացվում է աշխարհի ամենամեծ բնապահպանական շարժումը՝ «Երկրի ժամը», որը ոգեշնչում և միավորում է միլիոնավոր մարդկանց՝ Երկիր մոլորակի պահպանության համար լուծումներ գտնելու և միջոցներ ձեռնարկելու շուրջ։
Միջոցառմանը մասնակցում է ավելի քան 190 երկիր և 7000 քաղաք՝ մեկ ժամով անջատելով տվյալ երկրում խորհրդանիշ համարվող շենքերի, շինությունների, ինչպես նաև քաղաքների և բնակավայրերի հիմնական փողոցների լուսավորությունը։
Արդեն իսկ ակնհայտ կլիմայական ճգնաժամով պայմանավորված՝ 2025 թվականին մենք նոր շունչ ենք հաղորդելու շարժմանը՝ «Երկրի ժամը» դարձնելով երբևէ կազմակերպվածներից ամենամասշտաբայինը։
Այս տարի «Երկրի ժամը» ամբողջ աշխարհում անցկացվելու է մարտի 22-ին, ժամը 20:30-21:30-ին։ Խնդրում և կոչ ենք անում միանալ այս միջազգային շարժմանը՝ մարտի 22-ին, ժամը 20:30-21:30-ը մեկ ժամով անջատելով խոշոր քաղաքների, խորհրդանշական շենքերի, շինությունների և հանրային տարածքների արտաքին լուսավորությունը։
Այս քայլը ոչ միայն կնպաստի հանրային իրազեկմանը, այլև կլինի խորհրդանշական ներդրում մեր մոլորակի պահպանության գործում։