2021 թվականի դեկտեմբերի 16-ի «Հայաստանի Հանրապետության քաղաքացիական օրենսգրքում լրացումներ և փոփոխություններ կատարելու մասին» N ՀՕ-397-Ն ՀՀ օրենքի 2-րդ հոդվածի 3-րդ մասի պահանջների համաձայն՝ ինքնակամ կառույցների (կիսակառույց ինքնակամ կառույցների հատվածների) վերաբերյալ տեղեկությունները և փաստաթղթերը հաշվառման նպատակով կառավարության որոշմամբ սահմանված կարգով ներկայացվում են Կադաստրի կոմիտե`
1)2021 թվականի հունվարի 1-ից մինչև սույն օրենքն ուժի մեջ մտնելու պահը կառուցված ինքնակամ կառույցների (կիսակառույց ինքնակամ կառույցների հատվածների) դեպքում` կառավարության որոշումն ուժի մեջ մտնելուց հետո` երկամսյա ժամկետում.
2) մինչև 2021 թվականի հունվարի 1-ը Երևան քաղաքի վարչական սահմաններում կառուցված ինքնակամ կառույցների (կիսակառույց ինքնակամ կառույցների հատվածների) դեպքում` մինչև 2023 թվականի հունվարի 1-ը.
3) մինչև 2021 թվականի հունվարի 1-ը քաղաքային բնակավայր ընդգրկող համայնքների վարչական սահմաններում կառուցված ինքնակամ կառույցների (կիսակառույց ինքնակամ կառույցների հատվածների) դեպքում` մինչև 2024 թվականի հունվարի 1-ը.
4) մինչև 2021 թվականի հունվարի 1-ը բացառապես գյուղական բնակավայրերից բաղկացած համայնքների վարչական սահմաններում կառուցված ինքնակամ կառույցների (կիսակառույց ինքնակամ կառույցների հատվածների) դեպքում` մինչև 2025 թվականի հունվարի 1-ը:
Հաշվի առնելով Երևան քաղաքում իրականացված ինքնակամ կառույցների հաշվառման փորձը և այն հանգամանքը, որ 2022 թվականի հունվարի 15-ից մինչև 2022 թվականի դեկտեմբերի 1-ն ընկած ժամանակահատվածում ներկայացված հաշվառման փաթեթների թվաքանակը գրեթե համարժեք է միայն դեկտեմբեր ամսվա ընթացքում հաշվառված անշարժ գույքերի թվաքանակին, հետևաբար սահմանված ժամկետներում ինքնակամ կառույցների հաշվառման գործընթացն արդյունավետ կազմակերպելու և հետագա խնդիրներից (պահանջարկի աճ, գնաճ և այլն) խուսափելու համար առաջարկում ենք բնակչությանը իրազեկել վերոգրյալի վերաբերյալ։